(EUROPA PRESS) El candidatu a la Secretaría Xeneral del PSOE Pedro Sánchez insistió esti llunes en qu’él empezó la so carrera «solu» y que foi creciendo «y muncho, n’apoyos». «Agora somos una mayoría los qu’aspiramos a un cambiu auténticu, dende embaxo, non a un cambiu dirixíu, ye a lo que yo aspiro», dixo.
Sánchez espresóse asina nuna entrevista n’Onda Cero recoyida por Europa Press dempués de conocese que foi l’aspirante más avaláu, con más de 41.000 respuendas por frente a los más de 25.000 d’Eduardo Madina y de los malpenes 10.000 de José Antonio Pérez Tapies.
Amás, mostróse «bien arguyosu» del fuerte apoyu que recibió n’Andalucía, pero sorrayó que tuvo un bon resultáu en toa España. «Lo importante ye tornar esi depósitu de confianza nuna alta participación y apoyu», añadió.
El diputáu madrilanu almitió que correspuende a los militantes dirimir «ente los matices» qu’existen ente les sos propuestes y les de Madina y Pérez Tapies, pero fizo valir la so condición de «profesor d’Economía» pa defender la creación d’un modelu económicu «alternativu y distintu» al del PP.
Tamién destacó que’l principal oxetivu del PSOE ha ser combatir la desigualdá, y destacó qu’esti llunes en Castiella y Lleón va falar de los entueyos p’acceder a la Xusticia por mor de les tases xudiciales y del abandonu de los abogaos nel turnu d’oficiu.
Según dixo, él ye partidariu de la intervención del Estáu na economía y nel funcionamientu de los partíos, acutando al máximu l’aforamientu de los diputaos, llendando a dos los mandatos del presidente del Gobiernu, y acabando cola inxerencia del Executivu nel xudicial, n’asuntos como los indultos.
En materia territorial, destacó que la so propuesta ye la Declaración de Granada, «non un referéndum llegal y pactao» sobre Cataluña, sinón una reforma federal de la Constitución pa resolver ésti y otros problemes.
