Iniciativa pol Asturianu presentó esti xueves un informe de la repercusión d’esta reivindicación en Twitter, onde la etiqueta o hahstag Oficialidá «convirtióse en viral, llegando a más de 500.000 persones y con un total 1,6 millones d’impresiones (númberu de vegaes que los tuits fueron vistos)».
Asina lo esplicó la organización nuna nota de prensa. Esti informe preparáu por Rubén Llames, secretariu d’Iniciativa pol Asturianu, «amuesa cómo se llanzaron tuits dende tol estáu español con especial incidencia dende Madrid, Cataluña y Euskadi, por esi orde, anque que tamién hubo actividá dende Inglaterra, Estaos Xuníos, Brasil, Chile, México y Venezuela. Puede destacar qu’inclusive hubo tuits reclamando la Oficialidá dende la isla africana de Santu Tomé», esplicó’l comunicáu.
Señala amás qu’el tuit más destacáu foi’l de la cantante Paula Coloráu, que con más de 120.000 siguidores reclamó la Oficialidá dende la so cuenta.
Dende Iniciativa pol Asturianu amosaron el so prestu pol protagonismu que tuvo y sigue teniendo nestos díes de campaña la reivindicación de la Oficialidá del asturianu». «La organización, que ye la entidá que tuitea n’asturianu con más siguidores na rede (2.630 siguidores), tuvo nel puestu segundu nel númberu de tuits fechos cola etiqueta Oficialidá, nun top 10 nel que tamién apaecen dellos miembros de la organización», añedió.
Pa Iniciativa pol Asturianu esta importante repercursión de la reivindicación de la oficialidá «nun fai más que confirmar la demanda social cada vegada mayor por que se reconoza a la llingua asturiana col estatus d’oficial, única forma de consiguir que se ponga en marcha un camín de midíes que garantice la supervivencia del asturianu y la reconocencia de los derechos de los falantes d’asturianu».
