El mes de noviembre probablemente va tener precipitaciones per debaxo de la media en Galicia, Cantábricu, noroeste peninsular, Pirineos y noroeste de Castiella y Llión y Estremadura, ente que na mariña Mediterránea y Baleares espérense más agües de lo normal, según el portal meteorolóxicu ‘eltiempo.es’.
Amás, señala qu’esti mes d’ochobre foi lluviosu especialmente nel suroeste y nel oeste peninsular según en delles zones de Canaries y de la mariña andaluza y en Llión.
El portal meteorolóxicu apunta que lo normal en noviembre son temperatures de 10,7 graos centígrados y precipitaciones alredor d’unos 75 llitros per metro cuadráu y recuerda qu’en noviembre de 2014 foi’l más húmedu dende 1997.
En concretu, añede que’l mes de noviembre ye’l mes más lluviosu n’Asturies, Cantabria, País Vascu, norte de Navarra, norte de Almería, interior de Murcia norte de Mallorca y Menorca según la sierra madrilana y suel llover a esgaya nel norte peninsular, norte d’Estremadura y suroeste de la Península.
Tocantes a les temperatures, les zones más fríes son la metá norte, zones de monte, como’l Cordal Cantábricu, Sistema Ibéricu, Central, Pirineos o Sierres d’Andalucía. Les xelaes son frecuentes sobremanera nes zones montascoses. Les nevaes empiecen a apaecer en cotes altes según les borrines.
Otra manera, les máximes suelen tar en valores d’ente 10 y 16 graos centígrados salvu en zones del Mediterráneu y sur d’Andalucía, onde suelen ser daqué cimeros ente 18 y 20 graos centígrados, según en Baleares. En Canaries suelen superar estos valores.
Finalmente, espón que les mínimes suélense baxar de cero grado centígrados en zones montascoses y en redol a los 2 a 6 graos centígrados en zones del norte y centru peninsular.
