L’actividá Veranu Lliterariu entra na tercer selmana’l llunes 20 cola participación de la escritora María Esther García López. El Veranu Lliterariu, que va pela cuarta edición, ye una actividá de promoción y animación a la llectura de lliteratura infantil n’asturianu, organizada pola Casa de la Llingua-Serviciu de Normalización Llingüística de Corvera, que va desarrollase a lo llargo de los meses de xunetu y agostu na Biblioteca de Las Vegas/Les Vegues.
La escritora María Esther García López trai a Corvera Menú de versos, un llibru que xuega colos menús chocantes d’un comedor escolar, y colos que l’autora busca que los neños disfruten pero qu’al empar tamién deprendan valores.
Esta cuarta sesión va facese’l llunes 20 de xunetu na Biblioteca de Las Vegas/Les Vegues, n’horariu de 11:30 a 12:30 hores. L’actividá ye d’asistencia llibre y de baldre.
