La Policía Local d’Uviéu detuvo a un home sobre les 10:00 hores de güei, n’intentando sustraer una pieza del Muséu Arqueolóxicu, dientro del horariu d’apertura al públicu. La rápida actuación de los servicios de seguridá del equipamientu foi decisiva a la d’atayar el robu y efectuar la detención.
L’home trató d’apoderase d’un bolaño pa bombarda (un proyectil pedrés esféricu) del sieglu XIV espuestu na tercer planta del muséu, pero la inmediata intervención de los responsables de seguridá, que detectaron la maniobra al traviés de les cámares de videovigilancia, atayó l’acción y obligó al lladrón a abandonar la pieza nel rellanu de la escalera de serviciu, ente les plantes primer y segundo.
Los servicios de seguridá, cola ayuda del personal del propiu centru, amenorgaron al individuu cuando intentaba abandonar l’equipamientu del Principáu d’Asturies y retener hasta la llegada de la Policía Local, que dio en la so detención. L’home va ser oxetu mañana d’un xuiciu rápidu.
La directora xeneral de Patrimoniu de la Conseyería d’Educación y Cultura, Otilia Requejo, y el director del Muséu Arqueolóxicu d’Asturies, Ignacio Alonso, allegaron al complexu al ser informaos del sucesu polos servicios de seguridá. Darréu, dambos personáronse na Comisaría d’Uviéu pa presentar la correspondiente denuncia y emprestar declaración.
La pieza oxeto del robu quedó llevemente estropiada, pero yá foi treslladada a los talleres de restauración del muséu. Otilia Requejo envaloró’l so valor en 2.000 euros y los desperfectos causaos pol sucesu, nunos 500. La directora xeneral de Patrimoniu felicitó a los responsables de seguridá y al personal del Muséu Arqueolóxicu “pola so dilixencia y la so profesionalidá”.
