Gaspar Llamazares, voceru parlamentariu d’IX na Xunta Xeneral, amuesa la so sorpresa poles declaraciones de Mercedes Fernández, presidenta del PP n’Asturies, na xunta del so comité executivu rexonal. A Llamazares lláma-y l’atención que’l PP asturianu convierta’l vetu al asturianu, un vetu preventivu, nel so principal asuntu de campaña electoral, anque podría tener otres munches prioridaes que tienen que ver cola vida de los asturianos. “La so principal prioridá ye negativa, cuando nun hai inda nin siquier hai un procesu de reforma del Estatutu d’Autonomía”, alvierte Llamazares.
El voceru d’IX señala tamién qu’esta última cuestión ye “entá peor” cuando’l PP na vecina comunidá de Galicia garantiza la co-oficialidá de la llingua gallega.
A xuiciu de Llamazares la técnica de Mercedes Fernández supon practicar un vetu, y la discriminación, xuntu col usu de los argumentos xenófobos y de calter personal. “Paez Puigdemont con argumentos xenófobos para quien nun nacimos n’Asturies”, sostien el voceru d’IX.
Llamazares considera qu’estos son los únicos planteamientos de la presidenta del PP n’Asturies “de xuru porque nun puede poner en valor lo que nun fixo’l Gobiernu central per Asturies en materia d’infraestructures, por casu, y porque tampoco puede poner en valor la so política d’oposición nel Principáu”.
