El grupu armáu Península del Sinaí, caña n’Exiptu de la formación yihadista Tao Islámicu, repitió esti miércoles que ta detrás del accidente del avión rusu na península del Sinaí, afirmando que va desvelar nun futuru cómo llogró baltar l’aeronave.
Nun mensaxe d’audiu publicáu nuna cuenta de la rede social Twitter utilizada pol grupu, Provincia del Sinaí indicó que’l presuntu valtamientu del avión foi lleváu a cabu «en respuesta a los bombardeos rusos que maten a cientos de musulmanes en territoriu siriu».
«Dicimos a los que nieguen y a los que dulden: morréi por causa de la vuesa frustración. Nós, cola gracia de Dios, somos los que lo baltamos, y nun tamos obligaos a desvelar el mecanismu», afirmó’l llocutor.
«Díi a los restos, buscái, traéi vueses ‘caxes negres’ y analizái, dáinos el resume de la vuesa investigación y el productu de la vuesa esperiencia y demostrái que nun lo baltamos o cómo s’estrelló», amestó.
Los analises de los cadabres recuperaos ente los restos del avión rusu que s’estrelló’l sábadu pasáu nel Sinaí amuesen que pudo producise una esplosión en plenu vuelu, tal como vinieron apuntando nos últimos díes fontes de la investigación.
Un espertu forense exipciu esplicó que los exames de les feríes topaes nes víctimes del accidente paecen confirmar la teoría de la esplosión. «Un gran númberu de partes indiquen que se produció una esplosión a bordu del avión primero qu’impactara contra’l suelu», afirmó, según l’axencia RIA Novosti.
Sicasí, un voceru del Ministeriu d’Aviación Civil d’Exiptu, Mohamed Rahmi, aseguró en declaraciones a Reuters que nun esisten pruebes de que l’avión españara nel aire.
La versión de la esplosión nel aire foi motivu d’alderique desque se produció l’accidente’l pasáu sábadu, na midida na que foi remanada como aval d’un supuestu atentáu que nenguna de les partes paez contemplar.
La mayoría de les 224 persones que viaxaben nel avión –217 pasaxeros y siete tripulantes– yeren de nacionalidá rusa, según l’aerollínea. Na aeronave tamién viaxaben cuatro persones de nacionalidá ucraniana y una bielorrusa.
