Pa esti miércoles espérense daqué menos de 25 graos centígrados nel estremu norte peninsular: norte de Galicia, Asturies, Cantabria, País Vascu, Navarra y norte d’Aragón. Mientres, nel sur de Galicia, Castiella y Llión, Aragón, les temperatures van siguir percima de 25 graos centígrados y en dalgún puntu d’Aragón van algamar los 28 o 30 graos centígrados, según l’Axencia Estatal de Meteoroloxía (AEMET).
A nivel nacional, les temperatures van baxar de forma progresiva a partir d’esti martes, de cuenta que a lo llargo de la selmana van recular de los 40 graos centígrados o más algamaos esta fin de selmana, de cuenta que van dar un llixeru respiru hasta’l vienres, cuando volverán xubir polo que la próxima fin de selmana va ser de nuevu bien calorosu,
El voceru axuntu de la AEMET, Modestu Sánchez, esplicó a Europa Press que tres la pasada fin de selmana «llegóse al máximu» y a partir d’esti martes van empezar a baxar «tantu les máximes como les mínimes». D’esta miente, indicó que les temperatures van ser «más nidies» a lo llargo de la selmana y les nocherniegues van empezar a ser más fresques a partir del miércoles.
Tocantes a la metá sur, Sánchez espera que sigan les altes temperatures pero «nun van pasar de 36 o 37 graos centígrados y, sía que non van permanecer per debaxo de los 40 graos centígrados».
Al respective de les nocherniegues, apuntó que van ser «daqué menos caloroses» una y bones la próxima madrugada van tener unos dos o tres grado centígrados menos anque entá va ser calorosa y tropical en munchos puntos. «Dempués yá podrá dormise meyor qu’estos díes», comentó.
Tocantes a les precipitaciones, espérase que se sigan rexistrando dellos bastios nel estremu norte y sobremanera nubes, que nun van abandonar los Pirineos hasta’l miércoles.
NUECHES CALOROSES
Sobre los valores mínimos máximos, comentó que na nueche d’esti llunes algamáronse 26 graos centígrados en Ciudá Real, «la más alta de toa España»; 25,4 graos centígrados en Madrid-Retiro; 25 graos centígrados en puntos como Sevilla, Toledo y numberosos puntos de la metá sur; 24 graos centígrados en Cáceres; 23 graos centígrados n’Huesca y mínimes de 18 o 17 graos centígrados en bona parte de Castiella y Llión.
Tocantes a les máximes, destacó los 42,1 graos centígrados rexistraos esti domingu en Montoro (Córdoba); 41,9 graos centígrados en Híjar (Huesca) y los 41 o 40 graos centígrados de numberosos observatorios de la metá sur peninsular como Villarrobledo (Albacete), Granada, Badayoz o Talavera de la Reina (Toledo).
