La Conseyería d’Economía y Empléu diseñó un plan pa rentabilizar al máximu’l patrociniu d’estes etapes de la prueba, qu’inclúi acciones como la instalación d’un puntu d’información turística, la repartida de banderes y material promocional, la impresión de los lemas de la campaña turística Guardianes del Paraísu en dellos puntos del percorríu y l’allugamientu de lones xigantes, ente otres. Según Kantar Media, el pasáu añu 3,9 millones d’espectadores siguieron per televisión les etapes asturianes de la Vuelta, una cifra que demuestra la relevancia de la prueba como mediu de promoción turística.
Amás, dende’l blogue oficial de www.asturias.es y los perfiles de Turismo Asturies nes redes sociales Facebook y Twitter tase informáu a los siguidores sobre les etapes de la Vuelta nel Principáu y la próxima selmana van sortease entraes VIP.
Percorríu de les etapes
La primera de les etapes va escurrir per Uviéu, Xixón, Villaviciosa, Colunga, Ribesella y Cangues d’Onís, nun percorríu de 152 kilómetros que va rematar cola mítica ascensión a los Llagos de Cuadonga, nel Parque Nacional de los Picos d’Europa.
La segunda etapa, considerada pola organización la etapa reina, va salir del Muséu de la Minería, en Samartín del Rei Aurelio, y va pasar per La Pola Llaviana, l’Altu de la Colladona, Mieres, l’Altu del Cordal, La Pola L.lena, Alto de la Cobertoria, Teberga y el puertu de San Llorienzo, pa rematar, tres 160 kilómetros, a una altitú de 1.700 metros, nel Parque Natural de Somiedu.
La caravana ciclista moviliza a unes 1.500 persones, ente les que s’inclúin periodistes de 120 medios de comunicación de too el mundu. Les plataformes qu’emitieron en directu en 2013 los dos etapes, RTVE y Teledeporte, llograron 2.217.000 espectadores na etapa Avilés-L´Angliru, ente que la etapa San Vicente de La Barquera- Alto del Naranco foi siguida en directu por 1.684.000 persones.
