El conseyeru d’Empléu, Industria y Turismu, Francisco Blanco, destacó güei l’apueste del Principáu por reforzar la presencia esterior de les empreses de la rexón con acciones como’l Foru Sector Agroalimentario, que s’inauguró esta mañana n’Avilés y que va tener calter biañal. Nel actu d’inauguración tamién participaron l’alcaldesa d’Avilés, Mariví Monteserín; el vicepresidente de la Cámara de Comerciu d’Avilés, Luis Noguera; el director xeneral de FADE, Alberto González; el subdireutor de Caxa Rural d’Asturies, Antonio Romero, y el director xeneral de Asturex, Alfonso del Ríu.
El conseyeru destacó qu’esta gran misión comercial inversa entamada pola Sociedá de Promoción Esterior del Principáu (Asturex) va favorecer que 53 empreses asturianes productores y comercializadoras de bébores, lácteos, carnes, embutíos, frutes y platos preparaos, ente otros productos, caltengan 1.500 xuntes con 160 potenciales compradores internacionales de 46 países.
Amás, van participar nel foru, que se va celebrar na cortil ferial de La Madalena hasta’l próximu xueves, los trés consorcios d’esportación constituyíos por Asturex y 11 de les empreses que formen parte del Programa d’Entamu a la Esportación que desenvuelve esta sociedá. Coles mesmes, el foru va cuntar cola visita de responsables de compres de cinco cadenes de supermercaos y mayoristas españoles con implantación nacional o rexonal.
Francisco Blanco señaló que col desenvolvimientu d’esti foru’l Gobiernu del Principáu “contribúi a l’apertura y afitamientu de nuevos mercaos y a la crecedera de les 617 empreses del sector agroalimentario qu’hai na rexón y qu’empleguen a más de 6.859 persones”.
El conseyeru manifestó qu’esta actividá industrial factura 2.000 millones d’euros añales y tien una cifra de negocios del 14,9% de l’actividá industrial. Amás, l’añu pasáu les esportaciones d’alimentación y bébores aumentaron un 4,5%.
El titular d’Industria manifestó qu’Asturies ye una rexón dinámica que supo afaese a los mercaos globales nos últimos años, como pon de manifiestu que les esportaciones asturianes pasaren de 2.570 millones nel añu 2009 a más de 3.750 millones en 2015.
Nesti sentíu, el conseyeru sorrayó que la internacionalización de la economía asturiana constitúi unu de los oxetivos prioritarios del so departamentu y, poro, una de les llínees estratéxiques de les polítiques de promoción empresarial. “En 2015 concedimos, al traviés de los trés convocatories d’ayudes a la internacionalización del Institutu de Desenvolvimientu Económicu del Principáu, 1,4 millones d’euros coles mires de reforzar la situación de la industria rexonal nel mercáu esterior”, indicó. Coles mesmes, manifestó que
Blanco tamién se refirió al esfuerzu realizáu por Asturex, sociedá integrada pol Gobiernu del Principáu al pie de la Federación Asturiana d’Empresarios, les Cámares de Comerciu y Liberbank, por especializar toles sos acciones y servicios, ufiertar soluciones a midida de les necesidaes de les empreses y potenciar la cooperación empresarial cola creación de consorcios d’esportación.
En relación al apueste pol sector agroalimentario, Blanco anunció que se diseñó un plan estratéxicu de internacionalización pa esti sector que se va desenvolver anguaño y qu’empieza col Foru Sector Agroalimentario. Esti plan, qu’escuerre l’afitamientu de los mercaos abiertos en 2015 y l’apertura de nuevos mercaos, contempla tamién la celebración d’otres misiones comerciales inverses, la participación en siete feries internacionales y promociones en puntu de vienta en supermercaos de distintos países.
