(EUROPA PRESS) L’escritor y políticu Joaquín Leguina cargó esti xueves contra’l secretariu xeneral de Mocedaes Socialistes d’España (JSE) y diputáu rexonal asturianu, Nino Torre. «Agora sal esti rapaz de JSE diciendo yo nun sé qué histories de que lo más importante ye monarquía o república. Convenía que s’estudiara’l so currículum. ¿Pero qué ye esto?», dixo Leguina nunes declaraciones nel programa Espejo Público d’Antena 3.
Al traviés de la so cuenta de Twitter el mesmu Nino Torre, llicenciáu en derechu, nun tardó en reaccionar y punxo un enllaz col despachu nel que trabayó. «Asina, la próxima fales con conocencia y sin despreciu», escribió-y a Leguina.
Les crítiques del expresidente socialista de la Comunidá de Madrid, Joaquín Leguina, nun quedaron nel dirixente de JSE. Ello ye que dixo que’l PSOE «tendría de suprimir» la organización xuvenil porque a eses edaes tendríen que tar estudiando. «Nun pue entrase en política dempués de facer la primer comunión y nun facer más en tola to vida hasta que te xubiles», manifestó.
Nesti puntu almitió que ta d’acuerdu coles manifestaciones realizaes pola alcaldesa de Madrid, Ana Botella, que se mostró en xineru del 2013 partidaria de suprimir les nueves xeneraciones de los partíos políticos. «Tien razón Ana botella. ¿O ye qu’ún cuando ye de dereches nun pue dicir les verdaes?», manifestó.
En declaraciones a Europa Press, Nino Torre esixó a Leguina «respetu» polos 15.000 militantes de JSE. «Que mos respete igual que nós lu respetamos a él».
Esplicó amás que punxo a disposición de Leguina un enllaz, nel ‘tuit’ mentáu nel qu’apaez detalláu’l so currículum, qu’inclúi una llicenciatura en Derechu, dos masters y cuatro años d’exerciciu. «Había ser más educáu», comentó Torre sobre Leguina.
D’últimes quiso recorda-y a Leguina que’l 99 por cientu d’esos 15.000 militantes «nun cobren nin un solu euru de la política» y son xente que tien la so carrera y el so trabayu, dedicando’l tiempu llibre que-yos queda a la política.
