Un trabayu internacional lideráu por dos investigadores españoles, José Vicente López-Bao y Víctor Sazatornil, el primeru de la Universidá d’Uviéu y el restante de la de Barcelona, asevera que los llobos asitien los sos llugares de reproducción n’espacios alloñaos, inalvertíos o de mal accesu pa los seres humanos.
La institución académica asturiana unvió un comunicáu de prensa nel que detalla que los 27 investigadores implicaos, ente ellos pertenecientes a la Universidá d’Uviéu, revisaron 728 llugares de cría distintos pa desenvolver l’estudiu.
La conclusión más destacada ye que «los llobos embriven el riesgu de interaccionar colos humanos cuando la so vulnerabilidá ye mayor (na dómina de reproducción), adoptando unes pautes de comportamientu similares en tola so área de distribución».
L’analís determina qu’esisten diferencies na sensibilidá de los llobos al escoyer allugamientos pa curiar a les críes según les zones xeográfiques; en Norteamérica esta ye menor que n’Europa y Asia. Sazatornil esplica que la mayor coesistencia de los llobos y l’actividá humana nestos dos últimos continentes provoca que la especie sía más cautelosa al escoyer ónde curiar a los sos cachorros.
Anque los llobos son capaces de vivir cerca del home na Península Ibérica, Sazatornil alvierte de que nun se debe resalvar la xestión del hábitat pal caltenimientu de la especie. L’investigador considera que la cuestión del hábitat «tendría d’empobinase siquier a garantizar pequenes zones dientro de los sos territorios nes que se caltenga una vexetación qu’ufierte protección y regúlese l’actividá humana mientres el periodu reproductor».
