La Conseyería d’Educación y Cultura acaba de constituyir la Xunta Asesora de Toponimia pa la llexislatura actual, coles mires de recuperar y dignificar los topónimos populares de conceyos, parroquies y pueblos. Dende 2004, esti organismu recuperó 16.565 nomes de llugares tradicionales y dexó rematar el procesu de oficialización toponímica en 53 conceyos, un trámite que ta en marcha anguaño n’otros 17.
La xunta asesora propónse completar nos próximos cuatro años el mapa toponímicu del Principáu nesta primer fase dedicada a les entidaes de población. Esti procesu empezó en mayu de 2004 cola constitución d’esti organismu que, de magar, desenvolvió un trabayu intensu de revisión y determinación toponímica, movilizando a espertos y cooperando con autoridaes municipales y colectivos vecinales y culturales.
El director xeneral de Planificación Llingüística y Normalización, Fernando Padilla, va presidir esta llexislatura la Xunta Asesora de Toponimia y el director xeneral d’Ordenación del Territoriu y Urbanismu, Juan José Fernández Pereiro, va ocupar la vicepresidencia.
