La Xunta Pola Defensa de la Llingua Asturiana (XDLA) consideró que’l fechu de que PSOE-PP-IX decidieren apostar pola contunidad d’Antonio Virgili al mandu de la RTPA «dexa en papel moyáu’l plan de dignificación del asturianu, aprobáu apocayá na Xunta Xeneral, amás del alcuerdu de investidura ente PSOE ya IX».
Nuna nota de prensa, la organización señala que «los dos testos falen de potenciar l’usu del nuesu idioma na programación de la radiotelevisión pública. Sicasí, este topeta cola renovación d’un director que nun quixo normalizar l’usu del idioma na programación y que solo lo arrequexó pa los usos humorísticu y diglósicu, ensin nengún cuidáu para cola so corrección y calidá».
«Nun se fixo apueste pola programación infantil n’asturianu, daqué estratéxicu si quier dase un futuru al nuesu idioma al traviés de la so tresmisión intergeneracional. Ye de reseñar que Virgili ta a puntu de roblar un alcuerdu cola multinacional americana Warner, nel que se van invertir dos millones d’euros que van salir del bolsu de tolos asturianos, pero que nun van xenerar nengún beneficiu nel territoriu», añedió.
La XDLA aportuna en que «de pocu valen les intenciones de dar pasos alantre cola planificación y normalización del idioma si dexar de llau la RTPA, preséu fundamental pa dar un pasu nestes polítiques». Con tou, la organización recuerda que «inda queden dellos cargos por nomar na dirección de la empresa pública, como’l de director de programación, que pueden ser vitales por que se faiga una política activa pol asturianu, pol que ye imprescindible cuntar con xente comprometida cola cultura asturiana nestos cargos».
«Quier dicise, xente que non un negar a desenvolver lexislación vixente -Estatutu, Llei d’Usu y Llei de RTPA, testos que reconocen el papel de la radiotelevisión pública nel procesu de recuperación del patrimoniu llingüísticu del país-«, añedió..
