La Universidá d’Uviéu va triplicar nun plazu de cuatro meses l’espaciu del Muséu de Xeoloxía, allugáu na facultá de Xeolóxiques del Campus de Llamaquique. Con una inversión de 190.000 euros, la institución académica preve «triplicar» l’espaciu pa esponer gran parte de los recursos qu’anguaño tán curiaos na litoteca por falta d’espaciu nel muséu.
Según indicó la Universidá nuna nota de prensa, les nueves instalaciones van cuntar con un accesu directu a la cai pa dar mayor visibilidá al espaciu y asina poder amontar el númberu de visitantes.
El Muséu de Xeoloxía, creáu en 2001, va pasar de los 122 metros cuadraos actuales a casi 300. L’ampliación va dexar de la mesma casi doblar el númberu de pieces esibíes, de les 700 que s’amuesen anguaño a más d’un millar. El muséu caltien curiaes nel so litoteca unes 32.000 pieces.
La intervención nel edificiu diseñáu por Ignacio Álvarez Castelao inclúi la integración de la vieya escalera de quemes de la fachada, y dota al equipamientu d’accesibilidá universal, cola instalación d’una plataforma elevadora p’arreglar el tramu d’escaleres na puerta d’accesu esterior.
Luis Miguel Rodríguez Terente, conservador del muséu, esplicó que ye previsible que tres l’ampliación dóblese’l númberu de visitantes. 4.000 persones pasen anguaño cada añu poles sos instalaciones.
La reforma va ser aprovechada de la mesma pa dotar d’un filo conductor a tol espaciu, de cuenta que’l visitante pueda conocer diverses disciplines xeolóxiques según el percorríu que realice.
Les instalaciones xeolóxiques alluguen pieces como’l meteoritu de Cangues d’Onís, qu’impactó nesta localidá’l 6 d’avientu de 1866, o’l de Cheliábinsk, que cutió Siberia’l 15 de febreru de 2013 y del que la Universidá caltien el primer fragmentu que llegó a España.
