La celebración de la Selmana Europea de Prevención de Borrafes, na que participen 28 países de toa Europa, arrinca mañana n’Asturies con 95 actividaes programaes y 87 entidaes participantes.
El Consorciu pa la Xestión de les Borrafes Sólides d’Asturies (Cogersa) va coordinar les acciones que van desenvolver alministraciones, empreses, centros educativos y organizaciones non gubernamentales, hasta’l próximu 30 de noviembre, coles mires de sensibilizar a los ciudadanos sobre la necesidá d’amenorgar la xeneración de borrafes.
El programa d’actividaes empieza mañana, a les 18:30 hores, nel Palaciu del Conde de Toreno (Uviéu), cola inauguración de la esposición fotográfica Voluntariáu ambiental Asturies, que rinde homenaxe a los participantes nes llimpieces voluntaries d’espacios naturales promovidas por Cogersa anguaño y el pasáu, nes que se recoyeron manualmente 63 tonelaes de borrafes.
La inauguración de la esposición va cuntar cola presencia de representantes del Gobiernu del Principáu, los conceyos implicaos y Cogersa, lo mesmo que de los grupos de voluntarios que participaron nes xeres de llimpieza. Nel actu tamién se va sopelexar el programa d’actividaes de la Selmana Europea de Prevención de Borrafes, na que collaboren 22 organismos de l’alministración pública, 46 centros educativos y 12 empreses, amás de cuatro organizaciones non gubernamentales y dos particulares.
A estes iniciatives súmase tamién la campaña de recoyida solidaria de pequenes borrafes eléctriques que llevó a cabu Cogersa mientres les últimes selmanes en collaboración cola Fundación Ecotec, con contenedores especiales asitiaos en 200 puntos d’Asturies. Per cada kilogramu de borrafes recoyíu va donase un euru al proyectu La bioescuela que Cáritas desenvuelve en Valliniello (Avilés) pa sofitar a moces en riesgu d’esclusión social na busca activa d’empléu.
