El presidente de la Federación Española de Conceyos y Provincies (FEMP), Abel Caballero, fixo un llamamientu a toles entidaes locales españoles pa convocar a los sos vecinos a un minutu de silenciu a les 12.00 hores de mañana domingu, 15 de noviembre, «como amuesa de repulsa y condena» a los atentaos terroristes de París que dexaron hasta’l momentu 128 víctimes mortales y 180 mancaos.
Caballero manifestó «el so consternación y el so pesar» ante los «tarrecibles acontecimientos» asocedíos la pasada nueche na capital francesa.
Estos atentaos «enllenaron de murnia y dolor el corazón de toos cuantos creemos na convivencia pacífica», indicó’l presidente de la federación nun comunicáu, nel qu’amosó la so condena a «cualquier forma de terrorismu y de barbarie, a cualquier manifestación violenta qu’escapa a toa razón».
Dende la federación, Caballero tresmitió la solidaridá del sector local español a l’alcaldesa de París, Anne Hidalgo, según a les families de mancaos y finaos y, polo xeneral, a tola sociedá parisina, «qu’encara momentos tan difíciles». «Compartimos el so dolor y tamos al so llau», añedió.
