La Dirección Xeneral de Tráficu (DGT) va reforzar la vixilancia nes carreteres por cuenta de la celebración esti domingu, 1 de noviembre, del día de Tolos Santos y el trespasu d’esta festividá al llunes nes comunidaes d’Andalucía, Aragón, Asturies, Baleares, Canaries, Cantabria, Castiella y Llión, Estremadura y Galicia, ante la previsión de que se produzan 775.000 desplazamientos más (17%) qu’una fin de selmana normal.
Según informó Tráficu, l’oxetivu d’esti dispositivu especial ye dar seguridá y fluidez a los ciudadanos nos sos desplazamientos, que, en munchos casos, van producise motivaos poles visites a los campusantos, d’ende que s’amonten tantu los viaxes de curtiu percorríu como de llargu percorríu.
Coles mesmes, la DGT adelantró que va instalar mientres estos díes carriles adicionales nel sentíu contrariu, nes carreteres que rexistren mayores intensidaes de circulación, sobremanera nes proximidaes de los grandes núcleos urbanos, pa evitar posibles retenciones.
Nesti sentíu, precisó que se va acutar la circulación de camiones polo xeneral y a los que tresporten determinaes mercancíes o precisen autorización en determinaos tramos de carreteres, díes y hores, por razones de seguridá vial, movilidá y fluidez de la circulación.
Amás, los axentes de l’Agrupación de Tráficu de la Guardia Civil va llevar a cabu controles integrales nos qu’amás de comprobar la velocidá, al conductor del vehículu va realizáse-y la prueba d’alcohol y drogues.
De cara a esta festividá, Tráficu aconseya preparar el viaxe informase del estáu de circulación de les carreteres antes d’entamalo, faciendo usu de les APP gratuita de la DGT, la páxina web, les cuentes de Twitter DGTes y InformacionDGT, los boletinos informativos en radiu, o’l teléfonu 011.
Per otra parte, la DGT encamienta circular coles lluces encendíes mientres el día, amenorgar la velocidá y aumentar la distancia de seguridá, frente a condiciones meteorolóxiques adverses habituales nesta dómina del añu como son l’agua, el vientu y la borrina, onde la visibilidá ye menor.
Realizar descansos cada dos hores y atender a la conducción son otros de los conseyos de Tráficu, que recuerda coles mesmes que tantu nos desplazamientos curtios como nos de llongura percorrida los ocupantes del vehículu tienen de llevar puestu la petrina de seguridá y los menores dir afechiscamente suxetos colos sos sistemes de retención infantil.
