La Dirección Xeneral de Tráficu va tomar midíes especiales les fines de selmana del branu pa evitar retenciones polos accesos a la sablera de Rodiles, en Villaviciosa. En concretu, van asitiase conos pa evitar cambeos de carril y ameyorar la fluidez del tráficu, señalizar na A-8 el grau d’ocupación de los aparcamientos de la zona o reforzar la presencia de la Guardia Civil a la entrada del túnel de Villaviciosa.
Nuna nota de prensa, l’alcalde de la villa, Alejandro Vega, esplicó qu’estes midíes nacen d’una xunta caltenida esti vienres cola Xefa Provincial de la DGT n’Asturies, Raquel Casáu, el Comandante Xefe del Sector de Tráficu d’Asturies, Jorge Luis Correes y representantes de la UTE de caltenimientu de l’A-8.
Na mesma, alcordóse la puesta en práctica d’una serie de midíes cola cuenta d’evitar no posible les retenciones que se producen les fines de selmana del branu na A-8 al altor de Villaviciosa, con motivu del accesu o regresu de les sableres. Dende esta fin de selmana poner en marcha un dispositivu que se va estender hasta’l 1 de setiembre.
La primera de les midíes va consistir nel allugamientu de conos na A-8, ente los puntos kilométricos 356+200 y 358+200 sentido Galicia, tramu que tien el so entamu a la salida del túnel de Villaviciosa. Caltiense’l marxe derechu de la calzada en sentíu de la marcha, respetando l’accesu y la salida a Villaviciosa y cortando nel marxe esquierdu’l tercer carril.
L’oxetivu ye consiguir una mayor fluidez del tráficu evitando l’encruz de vehículos d’un carril a otru
Per otru llau, va señalizar na A-8, al traviés de los paneles de señalización variable, información relativa a la ocupación de los aparcamientos esistentes na sablera de Rodiles, de forma que el conductores tengan conocencia del momentu en que se completa’l so aforu.
Coles mesmes, va reforzar en momentos puntuales de la presencia de la Guardia Civil a la entrada del túnel de Villaviciosa, activando la circulación y torgando que el conductores amenorguen la velocidá de forma escesiva, evitando asina que se produzan frenaes continues y ayudando a caltener la fluidez del tráficu.
