La conseyera d’Educación, Cultura y Deporte, Ana González, denunció güei el conveniu de collaboración unviáu pol Ministeriu d’Educación, Cultura y Deporte a les comunidaes autónomes pal financiamientu de la Llei Orgánica pa la Meyora de la Calidá Educativa (LOMCE) y alvirtió de qu’intenten consiguir el vistu bonu a la normativa por aciu un alcuerdu. “Esto ye, que si quies que te deamos daqué de dineru, tienes que dicir que sí a tou, cuando a lo llargo de la tramitación y desenvolvimientu de la LOMCE, el Principáu manifestó’l so refugu a la norma”, aseguró.
González tamién señaló que’l ministeriu “nun puede pretender que pela puerta de tras roblemos un documentu qu’empieza eponderando a la LOMCE” y condergó que’l Gobiernu de Mariano Rajoy siga encerriscáu en destinar 4,5 millones pa la implantación de la Formación Profesional Básica nel períodu 2014-2017, cuando la estimación del Principáu xubía a un mínimu de 16 millones d’euros.
Tocantes a la fórmula del conveniu, la conseyera alvirtió de que’l dineru previsto pal financiamientu va computar pal déficit presupuestariu, lo qu’amenorga la capacidá económica de la comunidá autónoma. “Fuera muncho más lóxicu que fixeren un anticipu de caxa que nun computara como déficit”, apuntó.
Amás, aportunó en que, a pesar de treslladar estes esmoliciones al ministeriu, “como siempres, amuésase insensible a cualquier suxerencia de les comunidaes y entá ye más cuando nun tán gobernaes pol mesmu partíu que’l Gobiernu central”.
