La Basílica de Santa María de Llanes acueye esti vienres, a partir de les 20.30 hores, l’Alcuentru de Polifonía, que va cuntar cola participación de l’Agrupación Coral Arraizpe de Bilbao, dirixida por Itziar López Arberas, y l’Agrupación Coral Conceyu de Llanes, dirixida por Pedro de Celis.
Según informa’l Conceyu nuna nota de prensa, Arraizpe ye una formación de voces graves fundada en 1957 nel barriu bilbaín de Rekalde. El so precedente foi la Coral La nuesa Señora del Rosario, nacida en 1947, que realizaba los sos ensayos nel antiguu cine Arraiz. L’agrupación coral cuenta con un repertoriu cercanu a les doscientes obres, ente motetes, zortzikos, habaneres, góspel y polifonía de dellos países.
En 1967 grabó’l so primer discu, tituláu Aires y cantares de Bilbao. Participa añalmente nos Conciertos de Primavera, entamaos por B.A.Y. (Federación de Coros de Bizkaia), según nos programes entamaos pol Conceyu de Bilbao (Kulturalde y Kultur Kalez Kale). Tolos años entama’l Memorial Bienveníu Pérez Ibáñez, n’homenaxe a un antiguu componente de la coral y participa en numberoses iniciatives de calter benéficu.
L’Agrupación Coral Conceyu de Llanes (antigua Capiya Clásica de Llanes, creada en 1997 por Jaime Sierra, director titular hasta 2006) abarca nel so repertoriu cancioneru popular asturianu, habaneres, adaptaciones del folclor y pieces del Renacimientu y del Barrocu.
La coral llanisca actuó nel Teatru Campoamor d’Uviéu, nel Parador Nacional de Cangues d’Onís, nes fiestes patronales de Palencia, na catedral de Santiago de Compostela, na ilesia de Santa Leocadia de Toledo, nel XIV Ciclu de Música Coral Navidiega La Albericia de Santander y nel V Ciclu Coral de Torrelavega. Grabó yá un discu.
L’Alcuentru de Polifonía forma parte del programa branizu d’actividaes culturales puestu en marcha pol Conceyu llaniscu.
