(EUROPA PRESS) L’IRPF va baxar a partir del 2015 una media del 12,5% pal conxuntu de los contribuyentes y un promediu del 23,5% pa los que ganen menos de 24.000 euros añales, según adelantó la vicepresidenta del Gobiernu, Soraya Sáenz de Santamaría al cabu de la xunta del Conseyu de Ministros.
Los nuevos tramos del IRPF van dir del mínimu del 19% -frente al 24,75% actual- al 45% -frente al máximu del 52%- según anunció esti vienres el ministru de Facienda y Alministraciones Públiques, Cristóbal Montoro, na rueda prensa posterior al Conseyu de Ministros.
Mientres, los rindimientos del aforru van pasar a tributar a un mínimu del 19% y un máximu del 23%, cuando entre en vixencia la reforma fiscal del Gobiernu nel añu 2016.
Amás, dellos colectivos, como families numberoses, con fíos, ascendientes o discapacitaos, van recibir una deducción que podrá cobrase por adelantao de 1.200 euros añales, que va poder ampliase según la situación personal de caún de los contribuyentes.
Pela so parte, l’Impuestu de Sociedaes va baxar al 28% nel 2015 y al 25% nel 2016 y van introducise deducciones ya incentivos pa que la tributación de les pymes quede nel 20%.
El IVA nun va subir, más allá de la subida que se va aprobar en dellos productos sanitarios derivaos d’una imposición europea.
