Una delegación d’Iniciativa pol Asturianu va participar esti xueves 25 de xunu na misión internacional que va tar presente nel 29 Conseyu de Derechos Humanos celebráu pol Altu Comisionado de la Organización de les Naciones Xuníes (ONU).
Esta visita surde frutu del trabayu realizáu nel ámbitu internacional por esta organización y pola pertenencia de la mesma, como representante de Asturies, a la entidá internacional European Language Equality Network (ELEN) formada por organizaciones en defensa de llingües en peligru de toa Europa.
Va unos meses Iniciativa pol Asturianu fixo públicu l’informe que s’apurrió a esti Altu Comisionado de Derechos Humanos, preparáu pola Vocalía de Rellaciones Internacionales de la organización, dirixida por Xosé B. Álvarez. Agora ye’l momentu del so defensa na sesión que dientro d’esti Conseyu va dedicar al cumplimientu de los Derechos Humanos n’España.
La delegación Ibérica de ELEN va presentar na sesión de control d’esti xueves los casos de discriminación que viven los falantes de les llingües distintes del castellán n’España, incluyendo la situación de violación de derechos humanos llingüísticos que viven en Asturies los asturfalantes, especialmente negativa pola falta d’oficialidá que namá l’asturianu y aragonés carecen nel estáu español, magar los encamientos fechos dende instituciones europees ya internacionales.
Los representantes d’Iniciativa pol Asturianu que van viaxar a Xinebra estos díes van participar na sesión onde se va faer revisión de los Derechos Humanos n’España ante l’Altu Comisionado y representantes del Gobiernu d’España, que van defender la so política al respective de les llingües minoritaries. Amás, según informa Iniciativa nuna nota de prensa, «van trabayar mientres el tiempu de la so visita pa dar a conocer la situación del asturianu ante los cientos de representantes internacionales que van participar nesta xornada mundial, na que la mesma guarda d’Iniciativa pol Asturianu dexa claro a les clares la situación d’anomalía llegal ya incumplimientu de los Derechos Humanos que supon la situación llegal de la llingua asturiana, desamparada del marcu xurídicu normal de la oficialidá».
La delegación que va asistir a Xinebra va tar formada pol presidente de la organización, Inaciu Galán, y la responsable d’activismu en redes sociales, Marissa Bordallo. Amás d’esta cita, van celebrar una xunta nel Centru Asturianu de Xinebra, nel que van presentar Iniciativa pol Asturianu a los munchos asturianos emigraos na zona, según establecer pontes de collaboración pa la realización d’actividaes y el fomentu del usu del asturianu ente la comunidá asturiana en Suiza.
