El conseyeru de Presidencia, Guillermo Martínez, recibió güei a un grupu de mozos del Centru Asturianu de México que participen nel programa Asina ye Asturies y sorrayó la voluntá del Gobiernu asturianu de caltenese cerca de toles persones venceyaes col Principáu que moren nel esterior.
“Más d’un 10% de la población d’Asturies mora nel esterior, concretamente hai 110.000 persones inscrites nel censu de votantes, pero’l númberu de persones que viven fora y tán venceyaes con esta comunidá ye enforma mayor y algama casi’l mediu millón”, precisó.
El titular de Presidencia celebró un alcuentru colos 28 mozos que visiten Asturies estos díes gracies al programa Asina ye Asturies. El Centru Asturianu de México punxo en marcha esta iniciativa en 1997 p’averar a mozos descendientes d’emigrantes al Principáu, la so cultura, les sos instituciones y la so redolada natural. De magar, más de 800 persones formaron parte del proyectu.
“Pa nós ye un honor recibivos y ver cómo se van formando xeneraciones y xeneraciones de descendientes asturianos que s’interesen por caltener el contactu cola nuesa autonomía”, apuntó’l conseyeru.
Guillermo Martínez tamién valoró l’esfuerzu realizáu polos emigrantes asturianos nel esterior, “porque supieron revertir inversiones na so tierra d’orixe”, y la so repercusión nel cambéu qu’esperimentó Asturies nes últimes décades. Nesti sentíu, destacó especialmente’l legáu material ya inmaterial” que dexó en México la colonia asturiana.
Nesta edición del programa participen 14 moces y 14 mozos d’edaes entendíes ente los 15 y los 19 años, que llegaron a Asturies el pasáu martes y que van tornar a México’l día 29, dempués de visitar los conceyos d’Avilés, Uviéu, Xixón, Cuideiru, Taramundi, Coaña, Colunga, Ribesella, Llanes, Cangues d’Onís, Onís, Ribedeva, Villaviciosa, Teberga y Llangréu. Mientres la so estancia nel Principáu van agospiar na Residencia Xuvenil Ramón Menéndez Pidal, d’Uviéu, y en Taramundi.
Nel añu 2010, el organizadores d’Asina ye Asturies solicitaron sofitu económicu al Gobiernu del Principáu que, dende esi momentu, collaboró na organización de les actividaes con una aportación global de 15.771 euros.
