(CHANCE) Los díes pasen y Yuyee sigue en prisión. La muyer de Frank Cuesta lleva 15 díes encarcelada por posesión de 0.005 gramos de cocaína. Condenada pola xusticia Tailandesa a quince años de cárcel, la familia de Yuyee llucha sin fuelgu pola so llibertá.
Frank empezó una campaña internacional al traviés de Twitter na que numberosos famosos mostráronse-y el so apoyu. «Gracies a tol mundu que muestra interés pola situación de Yuyee. Yá son 15 nueches na cárcel y nun ye que seya’l fin del mundu, pero ye una situación inxusta y por eso toi lluchando pa que puea salir y tar colos sos fíos», escribía bien triste Frank.
L’antiguu tenista -famosu polos sos programes de televisión na selva- nun va para na so llucha. Él mesmu confesó que se siente culpable de la situación de Yuyee. Les sos continues denuncies al tráficu illegal d’animales podríen ser la causa d’esta condena.
«Yo toi lluchando por una inxusticia que se produxo dientro de dos poderes. Repito siempre lo mesmo, porque nun pue mayase a un país y a una xente por dalgunos pocos. En tolos llaos hai xente bueno y malo, y como digo siempre yo paez que tengo magnetismu por toca-y les narices a los malos. La xente de Tailandia ye maraviyosa y ta intentando camudar coses que lleven munchos años enraigonaes. Los cambios son lentos pero nun quiero esviar el focu pa falar mal d’un país polo xeneral. Esto ye una situación qu’afecta a policíes y poder xudicial. Una sentencia que me paez inxusta dafechu y que lleva muncho más detrás qu’una sentencia a 15 años de cárcel», confesaba Frank intentando que la rabia pola condena de Yuyee nun se focalice nun país enteru, sinón namás nos responsables d’esta situación.
