L’axencia de calificación creiticia Fitch Ratings decidió caltener intactu’l mínimu de calificación de les comunidaes autónomes nel nivel de grau d’inversión ,’BBB-‘, de resultes del sofitu del Gobiernu central al traviés del Fondu de Lliquidez Autonómica (FLA) y el Fondu de Pagu a Provisores (FPP), pero sollertó de los riesgos que presenta la incertidume política, polo que preve que’l balance fiscal de les comunidaes siga en colloráu mientres 2016.
L’axencia de calificación valora positivamente’l nuevu modelu, trimestral en cuenta de añal, d’analís del sistema de financiamientu autonómicu, yá que dexa que les partíes presupuestaries sían «más flexibles» y «ameyora» la conexón ente’l soporte presupuestarios de l’Alministración Central y los planes presupuestarios de les comunidaes autónomes.
Sicasí, Fitch considera que, «na práctica», l’actual modelu de financiamientu va caltenese siquier hasta que se conforme un nuevu Gobiernu, y agora que les negociaciones sobre la reforma d’este van quedar inconclusas por causa de les elecciones xenerales que van tener llugar el próximu 26 de xunu.
«La continua incertidume política podría retrasar la finalización de les reformes nel financiamientu autonómicu y el cumplimientu de la Llei d’Estabilidá Presupuestaria», esplica l’axencia, que señala que los cambeos nel modelu tamién ayuden a xenerar incertidume en referir al funcionamientu del sistema.
Asina, frente a les previsiones de delles comunidaes autónomes, qu’indiquen qu’el so balance fiscal va ser positivu en 2016, Fitch preve que los gastos superen a los ingresos de les comunidaes autónomes mientres anguaño, polo que monitorizará toos estos factores pa evaluar correchamente’l nivel de rating mínimu apropiáu.
