El Ministeriu de Facienda va unviar esti martes la carta na qu’indica les nueves esixencies que s’imponen a les comunidaes autónomes que l’añu pasáu incumplieron l’oxetivu de déficit y que tán obligaes a aprobar un alcuerdu de non disponibilidad y a unviar información mensual del cumplimientu de la riegla de gastu.
Asina lo anunció ayeri’l ministru en funciones, Cristóbal Montoro, en rueda de prensa en axuntándose col presidente de la Generalitat Valenciana, Ximo Puig. Montoro amosóse «convencíu» de que les midíes esixíes van ser «abondes pa correxir la esviación de déficit».
Namá Galicia, País Vascu y Canaries cumplieron l’oxetivu de déficit del 0,7% establecíu pal añu pasáu ente que toles demás entepasáronse, una esviación que supunxo un encamientu a España de la Comisión Europea. Tres esti avisu, la selmana pasada, la Comisión Delegada del Gobiernu p’Asuntos Económicos alcordó tomar midíes coles autonomíes incumplidoras.
Asina, l’Executivu va obligar a estes CCAA a aprobar un alcuerdu de gobiernu de non disponibilidad, pa garantizar que los recursos de financiamientu que van recibir anguaño nun sirvan pa financiar nuevu gastu, sinón el que yá ta previstu y tán executando anguaño.
El ministru aportunó no que yá esplicó la selmana pasada, que nun se trata d’encamentar a que les autonomíes apliquen retayos sinón que nun aumentar gastu públicu sobre lo que yá tien previstu. Anguaño van recibir 10.000 millones d’euros más de los Presupuestos Xenerales del Estáu qu’en 2015, ente’l sistema de financiamientu y la lliquidación del sistema de financiamientu de 2014, que-yos ye favorable, dineru que nun van poder emplegar pa pagar nuevu gastu.
Amás, los interventores de cada gobiernu autonómicu tendrá d’unviar mensualmente a Facienda’l cumplimientu de la riegla de gastu per parte de les autonomíes, esa obligación de nun gastar más de lo que s’ingresa. La información va ser tamién publicada.
