(Notimérica/EP) Un home condenáu a muerte por matar a la so esposa y al so fíu de cinco años d’edá fai casi 30 años foi’l tercer presu executáu n’Estaos Uníos nes últimes 24 hores, dempués d’un periodu de siete semana sin aplicar la pena de muerte, pol fallu na alministración de la inyección letal al reu Clayton Lockett, n’Oklahoma, el pasáu mes d’abril.
A John R. Henry, de 63 años, a lo último executáronlu esti miércoles na prisión estatal de Florida, onde morrió a les 19.43 hores (hora llocal), tres pidir perdón a les families de les sos víctimes nuna corta declaración final, según informaron les autoridaes llocales.
Hores antes executaron en Misuri John Winfield, al que se-y punxo la inyección letal a les 00.01 del miércoles (hora llocal). Nueve minuto dempués certificóse la so muerte, acordies col comunicáu publicáu pol Departamentu de Seguridá Pública de Misuri y publicáu pol portal de noticies de la cadena estaounidense CNN.
A Winfield condenáronlu por matar a dos muyeres y dexar ciega a una tercera nun tirotéu en 1996. Los abogaos del reu fracasaron nel so intentu de paralizar la execución con un recursu ante’l Tribunal Supremu.
El primeru de los reos sentenciaos nesta atípica xornada foi Marcus Wellons, de 59 años d’edá, al que se-y suministró una dosis mortal de pentoarbital na prisión de Jackson, en Xeorxa. A Wellons condenáronlu a muerte en 1993 por violar y asesinar a una neña de 15 años d’edá.
Estes execuciones acabaron con siete selmanes sin pena de muerte n’Estaos Uníos, por cuenta del discutiniu xeneráu pola angustiosa muerte de Lockett, por causa de una mala combinación de les drogues que componen la inyección letal.
Lockett, condenáu a la pena capital por violación, morrió d’un infartu tres 43 minutos agónicos según confirmó un informe preliminar publicáu la selmana pasada a una mala aplicación de la inyección letal.
Los estaos que caltienen la pena de muerte n’Estaos Uníos emplegaron tres inyecciones letales distintes mientres les últimes décades, pero les empreses farmacéutiques dexaron de vender eses drogues nos últimos años.
