Espertos van analizar esti xueves nuna mesa redonda l’usu vehicular de la llingua asturiana nos medios d’espardimientu, nun actu que va tar moderáu pol coordinador del Seminariu de Filoloxía Asturiana de la Universidá d’Uviéu, Ramón d’Andrés.
Asina, la directora del Serviciu de Publicaciones de la Universidá, Ana Isabel González, el candidatu a rector José Muñiz Fernández, la escritora y responsable de la Editorial Torga Esther Prieto, y los tamién escritores Antón García y Xuan Xosé Sánchez Vicente, van falar sobre esti asuntu desque les 12.00 hores.
L’actu ta incluyíu na programación de la Xornada sobre L’impactu y l’Espardimientu de la Llingua, que la entama mesma Universidá na aula rector del Edificiu Históricu.
Antes de la Mesa Redonda, a los diez, el profesor Xulio Viejo va protagonizar la llección inaugural sobre la presencia de la llingua na Universidá d’Uviéu, perspectives, hestoria y actualidá.
A les 15.15 hores la Xunta Pola Defensa de la Llingua Asturiana entama un taller prácticu pa guah.es y adultos sobre aprendizaxe de la llingua, y a les 16.00 hores, el catedráticu de la Escuela Universitaria de Maxisteriu Jesús García Albá va impartir una esperiencia didáctica.
A les 17.30 va haber un recital poéticu nel que van participar Pablo Texón, Xuan Bellu, Marta Mori, Alejandro Fernández Osorio y Fame Poétika. La Xornada va acabar cola llección de clausura de la profesora María Belén Sampedro, ‘Nós tamién tenemos hestoria’.
