El conseyeru d’Economía y Empléu, Graciano Torre, señaló güei que les visites de turistes estranxeros a Asturies aumentaron anguaño un 18,4% en relación con 2013 y que les pernoctaciones crecieron un 15,5% nel mesmu períodu. Torre, que participó en Londres na inauguración de la feria World Travel Market, aseguró que les campañes de promoción del Principáu “tán dando los sos frutos” y comprometióse a reforzales.
El titular d’Economía visitó güei el espositores del certame británicu, unu de los más importantes del mundu xuntu cola ITB (Berlín) y Fitur (Madrid), y nel que’l Principáu participa con un espaciu propiu dientro del estand de Turespaña. Tamién caltuvo dellos alcuentros institucionales y con turoperadores que yá incorporaron Asturies a la so programación. Coles mesmes, celebró una xunta de trabayu con representantes de l’Asociación d’Escritores de Viaxes del Reinu Uníu, a quien convidó a viaxar al Principáu por que conozan la so ufierta y pase a formar parte de los sos itinerarios.
La celebración de la feria londinense coincide cola recién llicitación de la campaña de promoción turística d’iviernu en mercaos internacionales que, a xuiciu del conseyeru, “supon l’arranque d’un plan reforzáu pa dar a conocer Asturies nel ámbitu internacional mientres el próximu añu”.
Según l’últimu informe añal del Institutu Nacional d’Estadística, el mercáu británicu ye’l segundu n’importancia p’Asturies, por detrás de Francia, con un total de 27.228 turistes y 65.106 pernoctaciones.
