El conseyeru de Sanidá, Francisco del Bustu, asistió esti martes a la firma del conveniu ente’l Serviciu de Salú del Principáu d’Asturies (Sespa) colos hospitales alcordaos –Sanatoriu Adaro, Cruz Roja de Xixón, Hospital de Jove y l’Hospital Fundación d’Avilés– colos que’l Principáu trabaya de forma habitual. El Sespa va financiar con más de 63 millones d’euros estos convenios.
Esti alcuerdu va regular la relación del Sespa colos hospitales de la rede d’usu públicu por aciu convenios singulares. Según esplicó’l conseyeru en declaraciones a los medios, por aciu esta firma dase relleno a un mandatu del parlamentu asturianu y al compromisu asumíu cola Sindicatura de Cuentes y los profesionales y pacientes de les árees nes que s’atopen estos centros. «Xunimos tolos compromisos y vamos cumplilos a raxatabla», señaló.
Ente los aspeutos que s’afiguraron nestos convenios apaez la constancia clara» de les tarifes, o la diferenciación de Jove como un hospital de distritu con actividá propia. Tamién figura la fixación d’unes llendes impuestes pola Comisión Europea de la Competencia, relativa a los beneficios que tienen de xenerar estos hospitales ensin ánimu d’arriquecimientu.
Col alcuerdu de güei, dixo, roblóse «un conveniu muncho más real» y acorde cola actividá que se desempeña nestos centros.
