El Pueblu d’Asturies de Xixón acueye esti domingu una nueva edición del Día de la Reciella, una xornada d’actividaes infantiles en llingua asturiana, entamada pola Asociación de Families Pol Asturianu Reciella.
Les actividaes van empezar a partir de les 11.00 hores con un taller de xuegos tradicionales con el monitores de l’Asociación Cultural Espiga.
El cocineru y comunicador Lluis Na Estrada, de 40 Primaveres, va faer una exhibición na que -siempres n’asturianu- la reciella va poder conocer secretos de la cocina sana al traviés de probar productos de «La Xixonesa». Na hora del vermú va ser momentu pa la música de la mano del dúo Entemez, que interpretá el so repertoriu empobináu a neños y neñes.
Les families pueden participar nuna Gynkana na que van tener qu’atopar unes lletres escondíes en dellos espacios del Muséu. Va Haber xuegos rellacionaos cola música pa pasar una hora prestosa n’El Tendayu y un conciertu de David Varela y Escuela La Quintana. Tamién va haber tiempu pa la Danza Prima.
Amás, mientres tol día va haber Feria del Llibru y del Discu n’Asturianu, ‘pintacares’, globoflexia, esposición ‘Agora, Quini, agora», de la Oficina de Normalización Llingüística de Xixón. La entrada y la participación nes actividaes ye gratuita, sacante’l ‘Pintacares’, que cuesta un euru.
Como tolos años, señala Reciella, «l’oxetu d’esta xornada ye poder pasar un día completu en familia nun espaciu y nun contestu nel que la música, los talleres, les actividaes y la comida sían n’asturianu».
