(EUROPA PRESS) El grupu del PSOE nel Congresu presentó esti xueves nel Rexistru del Tribunal Constitucional (TC) un recursu d’inconstitucionalidá contra la reforma de la Llei Orgánica del Poder Xudicial (LOPX) que llenda la xurisdicción universal por considerar que’l preceptu fraya la tutela xudicial efectiva, la independencia de los xueces y los convenios internacionales regulaos na mesma Carta Magna.
La encargada d’apurrir el recursu foi la vocera del grupu, Soraya Rodríguez, que xustificó a les puertes del tribunal que’l motivu principal del recursu ye que la disposición transistoria aprobada col únicu apoyu del PP obliga a los xueces y tribunales que tienen abiertes causes en virtú del principiu de xurisdicción universal a zarrales, contraviniendo dellos principios constitucionales.
«Pregunté-y a un maxistráu con munchos años d’esperiencia si dalguna vez viera que la publicación d’una llei nel BOE obligara a un xuez a sobreseer un procedimientu xudicial y contestóme: Non Soraya, nun lo vi dende que nesti país gobernaba Franco», manifestó la vocera.
Rodríguez destacó que la norma aprobada a instancies del PP atenta contra los principios que permiten escorrer los crimes más tarrecibles contra la humanidá y «xenera la impunidá de los criminales».
«La xurisdicción universal anque dacuando nun paez efectiva porque nun se puen realmente concluyir los procesos abiertos, siempre ye efectiva cuando existe, porque establez un principiu de que nun hai impunidá frente a estos graves crimes», añadió la vocera socialista.
