El Gobiernu d’Asturies va poner en marcha, primero que remate 2016, una midida estraordinaria pa garantizar el suministru de melecines a los asturianos que moren en Venezuela. Asina lo tresmitió’l conseyeru de Presidencia y Participación Ciudadana, Guillermo Martínez, al presidente de la Fundación Centro Asturianu de Caracas, Miguel Ángel Bobes, y al presidente del Centru Asturianu de Caracas, Bany Ordóñez, nuna xunta celebrada n’Uviéu, a la que tamién asistió la directora xeneral d’Emigración y Cooperación al Desenvolvimientu, Begoña Serrano.
Asturies ye, xuntu con Canaries, la única comunidá autónoma que costea la sanidá de los emigrantes ensin recursos asitiaos en Venezuela. Esta ayuda ye frutu del alcuerdu que robló en 2014 el Gobiernu del Principáu cola Fundación España Salú de Venezuela. Hasta’l momentu la inversión foi de 135.000 euros y benefició a 82 persones.
Unu de los grandes oxetivos del Executivu autonómicu pasa por ameyorar les condiciones sociales y reforzar los derechos de la población asturiana nel esterior. Pa cumplilo, l’IV Plan d’Emigración del Principáu (2013-2016) contribúi a sufragar les necesidaes básiques de subsistencia d’esta población, tales como agospiamientu, asistencia sanitaria y gastos farmacéuticos.
Anguaño, hai 5.709 asturianos censaos en Venezuela. Nos últimos años la difícil situación de munchos d’ellos haise vistu agravada pola crisis política y económica que carez el país, que se convirtió n’unu de los principales focos de les ayudes del Principáu a la emigración.
Asina, dende 2012 invirtiéronse 443.725 euros n’ayudes sociales partíes ente 654 asturianos. Y otros cinco persones afincaes nel país pudieron acoyese al Programa Añoranza, que favorez el realcuentru con Asturies de mayores qu’escarecen de recursos.
El compromisu del Centru Asturianu de Caracas
El Centru Asturianu de Caracas celebró’l so 60º aniversariu en 2014 y anguaño suma 3.253 socios. Dende 1993 cuenta con una fundación, que dispon d’un centru de día y de consultorios de medicina xeneral y delles especialidaes.
Tanto’l centru como la fundación espresaron nos últimos meses la so esmolición pola situación de desabastecimiento de melecines que pon en riesgu, non yá la salú, sinón tamién la mesma supervivencia de dellos emigrantes, especialmente a la d’encarar tratamientos oncolóxicos o d’atender la hipertensión y la diabetes.
Pa contribuyir a resolver estes faltes, la Conseyería de Presidencia y Participación Ciudadana va desenvolver un sistema d’alquisición y unviada de melecines a Venezuela por un periodu non inferior a seis meses prorrogables en función de la situación del país.
