El conseyeru de Presidencia y Participación Ciudadana, Guillermo Martínez, señaló güei nel plenu de la Xunta Xeneral qu’el so departamentu va reforzar l’atención psicosocial a les muyeres víctimes de violencia machista p’ameyorar el so defensa nos xuicios, nos que’l maltratu psicolóxicu resulta siempres más malo de probar. Esti compromisu ta recoyíu na segunda exa del Pactu Social contra la Violencia sobre les Muyeres del Principáu d’Asturies, qu’asegura una respuesta contundente de les instituciones y la sociedá frente a esta lacra.
P’avanzar nesti oxetivu, el Principáu espera cuntar cola collaboración de los representantes de l’Alministración de xusticia, como xueces, maxistraos, fiscales y colexos profesionales. Tamién va valorar la necesidá d’ameyorar la formación d’estos profesionales en violencia de xéneru pa tratar d’afaer les sos intervenciones a la realidá de les víctimes.
La llucha contra la violencia doméstica foi una prioridá constante pal Gobiernu d’Asturies, como reflexen la creación, en 1999, del Institutu Asturianu de la Muyer; la puesta en marcha, en 2007, del centru d’atención integral a les víctimes (Casa Malva), y l’aprobación, cuatro año dempués, de la Llei d’Igualdá de Muyeres y Homes y la Erradicación de la Violencia de Xéneru.
El conseyeru recordó qu’esi compromisu coles víctimes tamién tuvo reflexu nos presupuestos autonómicos: “L’apueste pola protección nun se vio afectada pola crisis, pos siempres caltuvimos qu’en materia de violencia de xéneru, tien d’haber un retayu presupuestariu cero”, indicó.
La última llexislatura vieno marcada pola aprobación y desenvolvimientu del primer plan estratéxicu d’igualdá (con una exa específica de violencia de xéneru) que se vio reforzáu pola firma del pactu social contra los malos tratos, que cunta con una batería de 150 midíes, y un nuevu protocolu sanitariu, qu’inclúi importantes meyores como la identificación de los daños psíquicu y midir p’apurrir a los xulgaos pruebes precises pa llograr que el agresores puedan ser condergaos pola xusticia.
El llabor del Institutu de Medicina Llegal
En 2015, l’equipu médicu-forense del Institutu de Medicina Llegal d’Asturies (IMLAS) realizó 806 informes en materia de violencia de xéneru, lo que supon una media de dos al día. Por conceyos, Uviéu y Xixón concentraron el 66% de los asuntos (533 actuaciones), siguíos d’Avilés (10,7% y 87 actuaciones), Llangréu (4,34% y 35 asuntos), Mieres (4,09% y 33 asuntos) y Siero (3,4% y 28 actuaciones).
El IMLAS cunta con 22 profesionales forenses, siete d’ellos de guardia, qu’asumen una mayor actividá en fines de selmana y periodos vacacionales nos que les families conviven más hores. Tamién dispon d’un equipu d’atención psicosocial formáu por dos psicólogos y una trabayadora social.
