La Conseyería d’Infraestructures, Ordenación del Territoriu y Mediu Ambiente sacó güei a llicitación la redacción del Plan Director de Suministru d’Agua n’Asturies pal periodu 2017-2037, que tendrá de recoyer los recursos hídricos, les instalaciones esistentes y les demandes d’agua. El documentu, que cunta con un presupuestu máximu de 240.000 euros y tendrá de tar apurríu nun plazu de doce meses, va incluyir tamién el diagnósticu de los defectos actuales y va dexar definir y planiar les fórmules p’atender la demanda prevista coles fayadices garantíes de cantidá y calidá.
Los principales oxetivos del trabayu son definir, programar y valorar económicamente les obres hidráuliques necesaries pa garantizar los fayadizos niveles de prestación de los servicios de suministru mientres el periodu de vixencia del plan, según determinar les midíes de protección y recuperación del mediu natural hídricu, con especial atención a les cuenques o mases d’agua que sirvan pal suministru de la población.
El plan va incorporar la previsión de les demandes de suministru d’agua de les distintes unidaes territoriales, la valoración en cantidá y calidá de los recursos hidrolóxicos disponibles y l’inventariu de los sistemes de suministru esistentes, xuntu con un diagnósticu del so estáu y funcionalidad, considerando tantu la so capacidá de suministru como’l so rendimientu, les sos necesidaes de caltenimientu o meyora y los sos parámetros tocantes a la calidá de l’agua suministrada.
El documentu va determinar tamién la capacidá de les infraestructures esistentes pa garantizar los volumes de suministru d’agua que se precisen, con unos determinaos parámetros calidable, y va encetar la planificación, definición y valoración económica de les infraestructures de captación, tratamientu, regulación y tresporte que se consideren necesaries pa correxir les faltes detectaes, tantu no relativo a necesidaes d’agua como a l’adecuación de la so calidá a los requisitos llegales vixentes.
