El conseyeru d’Empléu, Industria y Turismu, Francisco Blanco, aseguró güei que’l Gobiernu d’Asturies va caltener el so apueste pol fomentu de la innovación y el desenvolvimientu tecnolóxicu como factor de crecedera económica y de meyora de la competitividá de les empreses asturianes.
Al traviés de distintes convocatories xestionaes pol Institutu de Desenvolvimientu Económicu del Principáu d’Asturies (Idepa) y la Fundación pal Fomentu n’Asturies de la Investigación Científica Aplicada y la Tecnoloxía (Ficyt), l’Executivu autonómicu va destinar esti exerciciu casi 18,5 millones a ayudes a la I+D+i.
Blanco, qu’inauguró una xornada convocada pol Idepa pa informar a les compañíes sobre les subvenciones previstes p’anguaño, recordó qu’en 2015 el Plan de Ciencia, Tecnoloxía ya Innovación destinó 74,2 millones a actividaes d’investigación y desenvolvimientu, un 5,5% más que l’añu anterior.
«Creemos que ye importante averar a les empreses a los distintos preseos de sofitu a la innovación, que nun sentíu ampliu ye fundamental pa ganar competitividá», destacó’l titular d’Empléu.
Pela so parte, la directora xeneral del Idepa, Eva Pando, detalló mientres les xornaes los nueve llínees d’ayudes rellacionaes cola innovación que l’institutu va poner en 2016 a disposición d’empreses y entamadores. Con un presupuestu de 9 millones, les convocatories van tar alliniaes cola Estratexa Rexonal d’Especialización Intelixente Asturies RIS3.
En 2015, el Idepa concedió 8,3 millones que sirvieron pa sofitar 192 proyectos, con una inversión global superior a los 22 millones. Amás, la directora de la Ficyt, Ánxeles Álvarez, punxo en valor los distintos programes de la fundación pal fomentu de la innovación y el desenvolvimientu d’actividaes investigadores.
Nesti sentíu, destacó dalgunes de les ayudes destinaes a empreses y centros d’investigación como les que sirven pa sofitar la participación en programes internacionales d’I+D+i, dotaes con 600.000 euros, o les del fomentu de la tresferencia de tecnoloxía, con un presupuestu de 400.000 euros.
