La Conseyería de Presidencia y Participación Ciudadana, al traviés de la Dirección Xeneral d’Emigración y Cooperación al Desenvolvimientu, convocó una nueva edición del programa «Raíces», empobináu a facilitar la visita de descendientes d’emigrantes asturianos a la tierra d’orixe de los sos padres y güelos, facilitando una mayor conocencia de la vida social, cultural, empresarial ya institucional del Principáu.
Raíces cunta anguaño con una dotación económica de 25.000 euros para convocar diez places. Les persones beneficiaries van viaxar a Asturies en septiembre para participar nun programa de visites y alcuentros nes principales contornes y conocer los llugares d’interés cultural y hestóricu de la comunidá.
A estes ayudes pueden optar aquellos descendientes d’emigrantes hasta tercer grau de consanguinidá que cumplan los siguientes requisitos: tener ente 18 y 35 años d’edá; morar en cualquier país d’Europa o América; cuntar con nacionalidá española y tar empadronaos nel Padrón d’Españoles Residentes nel Esterior (PERE) en dalgún conceyu asturianu; escarecer d’ingresos, y nun viaxar nunca a España.
Dende la so primer convocatoria en 2013, como xuno de los nuevos programes incluyíos nel IV Plan d’Emigración del Principáu d’Asturies, participaron nél 30 mozos procedentes de los siguientes países: Arxentina (20), Brasil (7), Venezuela (1), Chile (1).
Per otru llau, el Principáu tamién convocó xuna nueva edición del programa Estudiar n’Asturies, que contempla la concesión d’hasta un máximu de cuatro beques pal desenvolvimientu d’estudios de máster na Universidá d’Uviéu.
Con una cuantía de 15.000 euros a distribuyir ente les cuatro beques por un importe non cimeru a 4.000 euros, les ayudes tán destinaes a estudiantes descendientes de persones emigrantes hasta segundu grau de consanguinidá, y cubren los gastos de matrícula y desplazamientu. Los másteres que se subvencionen son: Protección xurídica de les persones y de los grupos vulnerables (dos beques); Dirección y Planificación del Turismu; Náutica y Xestión del Tresporte Marítimu, ya Inxeniería Enerxética.
El plazu de solicitú pa optar al programa «Raíces» ta abiertu del 29 de marzu al 27 d’abril y el d’Estudiar n’Asturies, del 29 de marzu al 17 d’abril. En dambos casos, les bases pueden consultase na páxina web www.emigrastur.es.
