El conseyeru d’Educación del Principáu, Genaro Alonso, destacó esti martes en Xixón que l’aplicación del decretu d’Orientación que va entrar a valir el próximu cursu escurre «con total normalidá» y ensin nenguna novedá, ente que se tien yá un borrador del decretu d’atención a la diversidá que s’espera pueda ser promulgáu tamién nel próximu cursu.
Asina lo indicó antes de participar na inauguración del Alcuentru ente Profesionales de la Orientación nel teatru de Llaboral Ciudá de la Cultura. Alonso destacó que’l decretu d’Orientación supon dir consolidando l’atención a la diversidá y el departamentu d’orientación, tantu na estructura de departamentos como nes unidaes d’orientación nos distintos centros educativos.
Con ello, consolídase la estructura d’orientación tantu en Secundaria, como Infantil y Primaria, en función del volume y númberu d’unidaes, bien con orientador o con departamentos d’orientación.
Según él, ye un decretu que faía muncha falta como tamién fai’l d’Atención a la Diversidá. Sobre esti postreru, apuntó que ye bien importante porque l’atención a la diversidá había alloriáu creciendo d’una manera «un pocu desordenáu» nos centros, y con esti decretu da un orde y garantiza meyor la so eficacia.
Esplicó, a esti respectu, que l’abanicu d’atención a la diversidá ye «bien ampliu y bien abigarrado», y dacuando nun s’entiende lo mesmo alrodiu de un conceutu. D’ende que’l decretu busca ordenar, ensin acabamientu de l’autonomía de los centros, toles midíes y en qué consisten.
Nun implica, sicasí, más necesidá de personal, porque Asturies, a xuiciu del conseyeru, cuenta con recursos «bien abondosos». Pa él, l’atención a la diversidá ta «bien» cubierta. Coles mesmes, resaltó que la figura del orientador ye «primordial» y si cumple bien el so oxetivu y el so papel ye «una garantía d’ésitu pa los alumnos», destacó. Xuníu a ello, remarcó qu’esti alcuentru ente orientadores ye importante porque busca coordinar la orientación educativa cola del empléu.
Preguntáu pola universalización del últimu cursu del Primer Ciclu d’Educación Infantil, el de 2 a 3 años, indicó qu’una vegada que se faiga la prematrícula van vese los espacios disponibles en colexos de Primaria ya Infantil cercanos a onde hai llista d’espera.
Eso sí, defendió que nun se trata «pa nada» d’esgazar el 2-3 del restu del ciclu educativu, sinón que se trata d’una cuestión «puramente física». La etapa, según él, sigue siendo «única» y la so dependencia correspuende a los conceyos.
Punxo d’exemplu qu’en Xixón hai precedentes, cuando neños de la escuela infantil de 0 a 3 Los Pegoyinos tuvieron que ser reasitiaos nun centru de Primaria ya Infantil por cuenta de unes obres. Aportunó en que «pa nada» dependen orgánicamente d’esos centros d’Infantil y Primaria nin tienen «nada» que ver cola estructura orgánica del colexu qu’ocupen. «Ye daqué coyuntural», aportunó.
Alonso apuntó que mientres non se camude’l modelu de xestión, y pel momento nun se va camudar anque se ta estudiando, a tolos efectos van siguir conveniados colos conceyos. Pa él, ye una cuestión económica y d’eficiencia», qu’en llugar de crear nueves aules, aprovéchense espacios yá esistentes n’otros centros.
Y respectu al IES Fregadures, defendió que’l Principáu caltien el compromisu adquiríu de la remodelación interna d’espacios que garanticen l’atención educativa’l próximu cursu, con independencia de que s’estudien otres propuestes.
