L’últimu Conseyu de Gobiernu del añu aprobó un gastu antemanáu de 26,8 millones d’euros, pal Plan Alcordáu y de 10,5 millones d’euros por que les entidaes locales caltengan el serviciu d’ayuda a casa y teleasistencia a persones dependientes. L’aprobación de los presupuestos de 2015 va dexar que los conceyos reciban estos fondos nel primer trimestre d’anguaño.
Los 37,2 millones d’euros van garantizar l’atención a más de 30.500 persones que se van beneficiar de los servicios sociales en 2015; el caltenimientu dende’l 1 de xineru del empléu de más de 2.700 trabayadores; y, que les entidaes locales puedan cumplir coles esixencies de la Llei de Reforma Local, al dota-yos de lliquidez dende primeros d’añu pa encarar el nuevu exerciciu.
El Plan Alcordáu, nel que participen l’Estáu, el Principáu y les entidaes locales, financia los servicios sociales básicos qu’empresten los conceyos y que beneficia a más de 28000 persones. Aplíquense midíes contra la esclusión social, ayudes d’emerxencia, programes d’incorporación social al traviés de los albergues y otros agospiamientos alternativos.
Coles mesmes, el plan contempla actuaciones empobinaes a les persones mayores, como los servicios d’ayuda a casa y teleasistencia. Tamién s’empresta’l serviciu de conciliación familiar y los programes pa fomentar la vida activo y saludable, por aciu la participación de la población nos centros rurales de sofitu diurnu.
Los últimos datos determinen que se concedieron ayudes d’emerxencia a 5.400 families; a 2.000, pa la incorporación social; por albergues y agospiamientos alternativos pasaron más de 2.600 persones; financiáronse 256 places en centros rurales de sofitu diurnu pa l’atención de persones mayores; el serviciu d’ayuda a casa emprestar a 8.500 persones; y, financiáronse 470 terminales de teleasistencia.
Amás el Principáu caltien colos conceyos convenios por qu’empresten servicios a persones dependientes. Nesti sentíu, el Conseyu de Gobiernu autorizó l’anticipu de gastu de 10,5 millones d’euros pa financiar la prestación d’ayuda a casa y teleasistencia, que beneficia anguaño a 2.500 persones dependientes de los distintos conceyos asturianos.
La Conseyería de Bienestar Social estima qu’en 2015, el serviciu d’ayuda a casa y teleasistencia va atender a más de 4.500 persones a partir del 1 de xunetu, cuando ente a valir el Grau I, y les persones dependientes moderaes puedan aportar de forma definitiva al sistema, tres l’aplazamientu qu’estableció’l Gobiernu central.
La cifra aprobada, por tanto, garantiza que les persones dependientes moderaes que rican de dambos servicios, puedan recibilos dende xunetu y pagar polos mesmos conforme a la normativa autonómica sobre copago de servicios, de la qu’agora namá se beneficien les persones dependientes con Grau III ya II.
Nel mes d’avientu entró a valir un amenorgamientu del 30% nel preciu a pagar pola ayuda a casa y del 25% pola teleasistencia. Sicasí, toles persones que la so capacidá económica ye inferior a los 798 euros al mes perciben estos servicios de forma gratuita, acordies con la normativa autonómica aprobada pol Gobiernu rexonal en 2013.
