El Conseyu de Gobiernu aprobó esta selmana’l decretu que declara d’utilidá pública, interés social y urxente execución la concentración parcelaria de calter priváu del monte de Acio, en Cangas. Pa la zona, establécense 79 árees como superficie d’unidá mínima de cultivu agrícola y 10 hectárees pa usu forestal. L’agrupación de propietarios del monte de Acio solicitara esta concentración.
Les concentraciones parcelarias dexen que más esplotaciones, tantu agrícoles como forestales, dispongan d’una base territorial reorganizada, con menos finques y más superficie, y bien comunicada per caminos fayadizos. Amás, ayuden a los propietarios a desenvolver la so actividá con mayor comodidá, competitividá y eficiencia.
Monte Atempa de los Gordos
Per otra parte, el Conseyu de Gobiernu tamién aprobó’l decretu pol que declara d’utilidá pública del monte Atempa de los Gordos, allugáu ente la Braña de Escardén y Candanedo, términos del pueblu de Naraval (Tinéu), según la so incorporación al Catálogu de Montes d’Utilidá Pública del Principáu d’Asturies. Esti terrén tien un total de 27,5 hectárees.
Atempa de los Gordos foi declaráu d’utilidá pública acordies con la llei de Montes y Ordenación Forestal del Principáu d’Asturies. Esta normativa establez que podrá dotase d’esta figura a los montes que sían esenciales pa la protección del suelo frente a procesos d’erosión; los asitiaos en cabeceres de cuenques hidrográfiques y que contribuyan a la regulación del réxime hidrolóxicu, evitando amenorgamientu d’ádenes, riaes ya hinchentes y defendiendo poblaciones, cultivos ya infraestructures. Coles mesmes, los que contribuyan a la diversidá biolóxica, la protección de la flora y la fauna o la preservación de la diversidá xenética ysobremanera, los que constituyan o formen parte d’espacios naturales protexíos, zones d’especial protección pa les aves, según los que constituyan elementos relevantes del paisaxe.
Amás, esti monte, axunta les característiques precises pa la promoción d’especies d’alta calidá maderera y cumple una función importante na meyora de la calidá de vida y de les condiciones económiques de la población rural.
Anguaño, la parcela dispon d’arboláu esvalixao de pinu radiata y ocalitu, procedente de la repoblación. Tamién cunta con arboláu de carbayu común, de rexeneración natural. El sotobosque ta compuestu básicamente de toxu y artos, y nes zones de vaguada esiste una orla de frondosas autóctones.
