L’Hospital Universitariu Central d’Asturies (HUCA) va poner en marcha esta selmana la cuarta resonancia nuclear magnética, treslladada dende l’antigua see del centru sanitariu, n’El Cristu, y llista yá pa realizar pruebes diagnósticas tres les revisiones oportunes.
El plan d’actividá programáu pol hospital preve que la máquina vaya aumentando progresivamente la so capacidá hasta algamar la máxima na segunda quincena de setiembre. Esta decisión deber a que la resonancia precisa pa cada tipu de prueba la instalación d’una aplicación específica afecha al correspondiente protocolu clínicu. Amás, d’esta miente va favorecese que’l personal especializáu nel so manexu conoza y familiarícese con seguridá con cada técnica y procedimientu.
Asina, cada selmana dirán incorporándose distintes aplicaciones y va ampliase el númberu de pruebes realizaes.
Una vegada rematáu esti procesu, el HUCA va poder realizar unes 400 resonancies magnétiques más cada mes, esto ye, ente 4.000 y 5.000 más per añu, lo que representa una medría del 20% sobre la capacidá actual. D’esta miente, l’amenorgamientu de los tiempos d’espera va notase yá a finales de 2016, pero va ser especialmente significativa nel primer semestre de 2017.
El Serviciu de Radioloxía yá llogró anguaño encurtiar notablemente les demorances en pruebes como les tomografíes axiales computarizadas (TAC), les mamografíes y les ecografíes.
