El Conseyu de Gobiernu foi informáu güei del alcuerdu alcanzáu cola Universidá d’Uviéu pa formalizar un marcu de financiamientu estable pa los próximos cuatro años (2015-2018). El compromisu adquiríu pol Gobiernu del Principáu y l’Universidá d’Uviéu facilita la calidá de la enseñanza cimera pública, el caltenimientu del empléu y el relevu xeneracional de la so plantiya de profesionales.
El Gobiernu asturianu fixo tolos esfuerzos al so algame por que servicios públicos esenciales, como l’asistencia social, la sanidá y l’educación, nesti casu la qu’ufierta la Universidá d’Uviéu, nun sufran les consecuencies de amenorgar de recursos.
Nesti contestu enmárcase l’alcuerdu alcanzáu pol Gobiernu del Principáu y l’Universidá d’Uviéu, que les sos principales llínees son les siguientes:
•Ufierta seguridá económica a la Universidá d’Uviéu.
•Facer por un periodu de cuatro año, hasta avientu de 2018.
•Ameyora la planificación del funcionamientu de la educación cimera.
•Garantiza la estabilidá llaboral a los distintos profesionales universitarios, principalmente al personal más nuevo.
•Amonta les partíes destinaes a les convocatories de beques y ayudes pa los estudiantes na midida na que álcese la capacidá de gastu de los Presupuestos del Principáu.
El Gobiernu asumió dende’l primer día de la presente llexislatura’l compromisu d’otorgar tol so sofitu a la Universidá d’Uviéu, al ser unu de los elementos claves de la calidá de la enseñanza de les nueves xeneraciones y del progresu social y económico de los asturianos.
La principal estorbisa pa llograr l’alcuerdu tuvo nel financiamientu pal presente exerciciu, una y bones el presupuestu de 2015 atopábase zarráu. La solución llegó por aciu una aportación estraordinaria de 1,2 millones na partida destinada a arreglu, amortización y caltenimientu d’edificios ya instalaciones (RAM), que va dexar a la Universidá cerrar ensin remanente negativu de tesorería y asina encarar los deslizamientos de gastu derivaos de l’antigüedá y productividá del personal de la institución académica a lo llargo d’anguaño. Amás, si’l remanente de tesorería entá con esta aportación resultara negativu, el Principáu fadría este mesmu añu una nueva aportación estraordinaria pa esaniciar dichu déficit. Per otra parte, les partíes de caltenimientu d’instalaciones y d’inversiones van xubir a partir de 2016 na midida na que amóntese la capacidá de gastu nos presupuestos del Principáu.
Los presupuestos del Principáu p’anguaño inclúin, namá nel ámbitu de la Conseyería d’Educación, más de 126 millones pa la Universidá d’Uviéu. Nesta partida inclúyense los 1,2 millones destinaos a sufragar el 25% de la paga extra de los funcionarios de la plantiya universitaria que, xuníos a los 1,2 apurríos a final del añu pasáu, suman un total de 2,4 millones. A ello habría qu’añedir otres partíes d’otres conseyeríes destinaes, principalmente, a investigación.
Independientemente de la importancia presupuestaria, l’alcuerdu ye una garantía d’estabilidá financiera, yá que a partir de 2016 van incluyir na partida pa la Universidá l’importe de los deslizamientos que se produzan nel capítulu de gastos de personal y que, amás, dirán consolidándose añu a añu.
La Universidá d’Uviéu demostró nestos años de llimitaciones presupuestaries una bona xestión económica, que’l so resultáu ye una institución ensin empeñar, que caltuvo l’empléu y l’apueste pol relevu xeneracional de los sos profesionales.
Esti alcuerdu ye’l puntu de partida por que una comisión mista trabaye d’equí p’arriba nun modelu de financiamientu por oxetivos que tenga en cuenta la ufierta académica de la Universidá y el so llabor investigador, ente otros aspeutos, pa llograr una mayor eficiencia nel gastu y na calidá educativa.
