El Conseyu de Gobiernu autorizó un gastu tresañal de 26.741.138,32 millones pa contratar la construcción d’un accesu viario a la parte d’Actividaes Loxístiques ya Industriales d’Asturies (ZALIA) por La Peñona, nel conceyu de Xixón. El plazu máximu pa la execución de los trabayos ye de 30 meses y espérase que les obres puedan empezar a finales d’anguaño.
El nuevu tramu, con un llargor de 4.240 metros, va comunicar la zona urbanizada de la plataforma loxística cola intersección de l’actual carretera AS-19, Xixón-Avilés. Nesti puntu la obra entroncará, cuando tean realizaos, colos accesos al puertu d’El Musel que tien d’executar el Ministeriu de Fomentu. Asina, esta obra va dexar que la zona loxística tea conectada tantu col puertu d’El Musel, al traviés del vial de Jove, como cola autovía del Cantábricu (A-8), al traviés del tramu ente Lloreda- La Peñona.
El proyectu técnicu preve una calzada única con dos carriles de 3,50 metros y arcenes llaterales de 1,75 metros, que doten a la carretera de la xeometría precisa pa un futuru desdoblamientu si la intensidá del tráficu y el desenvolvimientu de la plataforma loxística riquir a mediu o llargu plazu.
La nueva carretera parte del vial yá construyíu na Zalia y conclúi na intersección cola carretera AS-19. El trazáu escurre ente l’autopista A-8 y la factoría de Veriña d’Arcelor y pasa polos polígonos industriales de Somonte, La Peñona, Bankunión y Tremañes. Una parte del trazáu avanza ente la carretera AS-236 y la depuradora d’Arcelor, según ente l’autovía A-8 y la carretera AS-236.
La obra inclúi la construcción de tres estructures necesaries pa salvar los ríos de la zona, la llínea ferroviaria de FEVE y distintes instalaciones de calter industrial. Tamién tán previstes cuatro glorietes: trés pa dar accesu a polígonos industriales y la postrera pal entronque col AS-19. Amás de les estructures mentaes, diséñense pasos inferiores y superiores colos que tamién se salven instalaciones industriales o caminos de serviciu p’accesu a finques particulares.
Les obres van suponer la realización de 408.868,60 metros cúbicos de desmontes y 648.845,80 de terremplénes. Coles mesmes, como midíes de restauración ambiental, tán previstes la hidrosiembra de 92.082 metros cuadraos de terrén y el plantíu de 4.324 especies arbóreas.
