El Conseyu de Gobiernu aprobó la declaración de la compra pública innovadora como oxetivu estratéxicu, col fin d’impulsar esti tipu d’actuaciones alministratives y ameyorar asina los servicios públicos. L’Executivu reconoz d’esta miente la importancia del mercáu de la contratación pública, que supon alredor del 17% del PIB de la Unión Europea, según el so eleváu potencial para impulsar la innovación.
El Principáu va ameyorar con esta declaración la manera en que realiza les sos compres, fomentando’l desenvolvimientu tecnolóxicu y xenerando oportunidaes para empreses innovadores en sectores prioritarios para’l nuevu modelu granible. Ello ye que esta ferramienta contractual ta prevista nel Plan de Ciencia, Tecnoloxía ya Innovación 2013-2017 y na Estratexa d’Especialización Intelixente RIS3.
La compra pública innovadora consiste na alquisición d’un bien o serviciu que nun esiste nel mercáu nesi momentu, pero que puede desenvolvese nun tiempu razonable, polo qu’implica’l desenvolvimientu de tecnoloxía nueva o ameyorada para cumplir los requisitos demandaos pol comprador.
La Conseyería d’Empléu, Industria y Turismu va crear una comisión, presidida pola directora xeneral d’Innovación y Emprendimiento, para impulsar esta modalidá, captar sinergias y enriar proyectos. Amás, va poner en marcha una oficina de compra pública innovadora y van programase cursos sobro esta ferramienta. Tamién se va habilitar xuna páxina web y un buzón de corréu al que los emplegaos de l’Alministración pueden faer llegar propuestes.
