El Conseyu de Gobiernu aprobó güei un gastu de cinco millones d’euros pal abonu del salariu social básicu correspondiente a los meses d’ochobre y noviembre. El creitu inicial envaloráu pal pagu d’esta prestación mientres anguaño xubía a 83,3 millones. L’ampliación autorizada güei alza esta cantidá hasta los 88,3. Sicasí, la Conseyería de Servicios y Derechos Sociales calcula que’l gastu va superar los 100 millones al rematar l’exerciciu. Va Ser la cantidá más alta dende la puesta en marcha del salariu social.
Anguaño, 17.698 persones cobren el salariu social, que cunta con una partida ampliable nos presupuestos rexonales. Esta prestación ye la principal ferramienta de llucha contra la esclusión social nel marcu de les polítiques que desenvuelve’l Principáu y favorez la protección social de 39.112 persones.
L’últimu Informe de Rentes Mínimes d’Insertamientu publicáu pol Ministeriu de Sanidá, Servicios Sociales ya Igualdá asitia a Asturies como la tercer comunidá con más persones atendíes en relación cola población, con una tasa de cobertoria del 3,26%, frente al 1,30% de media nacional.
El Principáu ye l’autonomía del réxime común de financiamientu que más recursos destina a una prestación d’ingresos mínimos, por detrás del País Vascu y Navarra, territorios con un sistema de financiamientu especial.
Amás, cumplióse l’oxetivu de tramitar les solicitúes iniciales del salariu social básicu nun plazu de tres meses y, d’esta miente, atender a les persones con escasos recursos económicos o en riesgu d’esclusión social cola mayor axilidá posible. El Gobiernu d’Asturies propónse agora caltener esos plazos na xestión de la prestación y esaniciar el retrasu na revisión d’espedientes.
