El Conseyu de Ministros, a propuesta del Ministeriu d’Agricultura, Alimentación y Mediu Ambiente, aprobó esti vienres la distribución ente les Comunidaes Autónomes de 33,89 millones d’euros p’actuaciones n’agricultura, alimentación y desenvolvimientu rural.
Con ello formalícense los criterios de distribución y la repartida de fondos alcordáu na Conferencia Sectorial d’Agricultura y Desenvolvimientu Rural.
De la cantidá total aprobóse la distribución de 33,17 millones d’euros pal financiamientu de los Programes de Desenvolvimientu Rural nel periodu 2014-2020. Esta cantidá correspuende a l’aportación de l’Alministración Xeneral del Estáu del 30% del financiamientu de cada programa de desenvolvimientu rural.
Una contribución estatal que, xuntu coles cantidaes qu’apurren les Comunidaes Autónomes, constitúi la cofinanciación de los fondos nacionales a l’aportación del FEADER.
Pa esta distribución territorial tomáronse como puntu de partida les previsiones tresmitíes poles Comunidaes Autónomes pa 2016.
Tamién s’aprobó la repartida de 717.808 euros pal Plan de consumu de fruta y verdura nes escueles, que’l so oxetivu ye frenar l’enclín al descensu del consumu d’estos productos, especialmente pronunciáu ente la población infantil. Tamién tien como finalidá contribuyir a la estratexa de llucha contra la obesidá y les enfermedaes acomuñaes a ella na Unión Europea.
Na distribución d’estos fondos tomóse en cuenta la participación presupuestaria de les Comunidaes Autónomes nel Plan del cursu escolar 2016-2017 comunicáu a la Comisión Europea, según los remanentes de fondos en delles Comunidaes Autónomes.
