El conseyu d’alministración del Consorciu de Tresportes d’Asturies (CTA), presidíu pola conseyera d’Infraestructures, Ordenación del Territoriu y Mediu Ambiente, Belén Fernández, aprobó güei los cambeos presupuestarios oportunes pa dotar al organismu de los fondos necesarios pa dos importantes inversiones venceyaes al denomináu bonu 10.
Per un sitiu, nos próximos meses va llevar a cabu un cambéu de software por que esti branu flexibilícese l’usu del bonu de diez viaxes, pasando de dexar cinco multivalidaciones con un mesmu títulu a diez uso simultáneos. Igualmente, aprobóse’l cambéu presupuestariu que va dexar sustituyir ente anguaño y el próximu toles máquines recargadoras. Esta inversión supon el primer pasu d’una renovación empuesta a afaer la infraestructura del CTA a nueves tecnoloxíes y configuraciones de los títulos de tresporte, como podría ser una tarxeta ciudadana apta pa distintos usos.
L’órganu de gobiernu del consorciu alcordó, coles mesmes, recurrir ante’l Tribunal Cimeru de Xusticia d’Asturies (TSXA) la sentencia dictada’l pasáu 5 d’abril pol xulgáu de lo contencioso-alministrativu númberu 3 d’Uviéu que consideraba necesariu qu’el CTA esperara a disponer d’un informe del Conceyu d’Uviéu pa exercer les sos competencies pa la fixación de paraes nel nuevu Hospital Universitariu Central d’Asturies (HUCA).
Los servicios xurídicos del CTA creen que resulta d’aplicación la sentencia favorable emitida díes dempués pol contenciosu-alministrativu númberu 1, tantu por ser la más recién como porque entra al fondu del asuntu, reconociendo la competencia del Gobiernu d’Asturies na fixación de les paraes de los servicios de tresporte interurbanu nel cascu urbanu.
Na xunta de güei, el CTA aprobó tamién la tresmisión de la concesión de la Compañía de la Tranvía Eléctricu d’Avilés (CTEA) ente Avilés-Llaranes-Candás, a favor de la empresa Autos Villa. El cambéu, que nun va afectar a los servicios nin a los horarios, va faese efectivu cuando Autos Villa apurra los vehículos necesarios para dicha esplotación y va ser anunciáu con abonda antelación a los usuarios.
