El Consorciu d’Agües d’Asturies (Cadasa), que preside la conseyera d’Infraestructures, Ordenación del Territoriu y Mediu Ambiente, Belén Fernández, y representantes de la empresa Víes y Construcciones, S.A., roblaron güei el contratu pa la execución de les obres de l’Arteria Norte, imprescindible pa garantizar el suministru de la zona costera central d’Asturies con agua del Altu Nalón.
Esta actuación, con un presupuestu de llicitación de 17.163.606,60 euros (IVA incluyíu), foi axudicada’l 28 de xunu por un importe de 12.872.704 euros y un plazu d’execución de 24 meses. Tres la firma del contratu, ta previstu que’l llevantamientu de l’acta de comprobación del replantego y l’entamu efectivu de los trabayos llevar a cabu nos primeros díes de setiembre.
La obra, financiada por Cadasa, supon la culminación de los trabayos de renovación de la rede de tuberíes previstos nel plan d’inversiones del consorciu en materia de suministru 2000-2014.
Los llabores van consistir na execución de 11.144 metros de nueva tubería, ente l’arqueta de derivación de Pinzales (Xixón) y el puntu final de la variante construyida por cuenta de les afecciones derivaes del encruz cola autovía minera (AS-1), na proximidaes del paraxa de Picar (Siero). Amás, el proyectu preve la construcción de dos arquetes singulares, una pa la derivación de l’Arteria Oeste y otra pa romper carga nes proximidaes de Ruedes (Xixón). La intervención nesta postrera inclúi una canalización pal aliviu de l’arqueta de frayatu y la reposición de l’arqueta de contadores previa a la entrega d’agua a la Empresa Municipal d’Agües (EMA) de Xixón en Ruedes.
El proyectu recueye tamién los dispositivos de maniobra y control necesarios pa la completa operación del sistema: arquetes de valvulería, airoses y desaguadorios, trés crucies de carretera executaos en llanca que suman un llargor de 168 metros y les actuaciones complementaries de reposición de servicios afectaos y acondicionamientu ambiental.
L’actuación va dexar garantizar el suministru de la zona costera central d’Asturies con agua del Altu Nalón, reponiendo, primero que s’escose la so vida útil, una tubería de formigón pretensado con más de 30 años d’antigüedá. Esta tubería abastez anguaño a los conceyos de Xixón, Carreño, Gozón, Corvera, Castrillón, Avilés, Sotu’l Barcu y Muros de Nalón y les industries d’Arcelor-Veriña, Du Pont y AZSA. En 2015 sirvió pal suministru de más de 35 millones de metros cúbicos d’agua (95.000 m³/día), lo que supon más del 70% del caudal total suministráu pol consorciu y supera el 57% de la demanda urbana del ámbitu sirvíu.
Esta obra supon el rediseño hidráulicu del sistema y preve que nel futuru, tres la construcción d’una nueva estación de bombéu, la nueva tubería pueda funcionar en impulsión, nel sentíu contrariu, de forma que sirva p’abastecer los conceyos de la área central (Uviéu, Siero, Llanera, Noreña, etc.) con recursos procedentes del Narcea trataos nes nueves instalaciones de la estación de tratamientu d’agua potable (ETAP) de Ablaneda, en Corvera.
