El Conseyu de Mocedá de Xixón va encetar esti sábadu nel so Comité Executivu, órganu nel que participen les 25 asociaciones que la componen, el relevu na presidencia de la entidá xuvenil tres l’arrenunciu presentáu por Javier Suárez Llana’l pasáu 30 de xunetu.
Según una nota de prensa del Conseyu, a pesar de nun esistir nenguna incompatibilidá llegal, la incorporación de Suárez Llana como técnicu al Grupu Municipal d’Izquierda Xunida nel Conceyu de Xixón llevólu a presentar el so arrenunciu a la presidencia del Conseyu «por coherencia política y personal y por ética».
Según Suárez Llana, «la decisión que tomamos colectivamente en 2012 de que per primer vegada’l presidente del Conseyu nun tuviera lliberáu sienta un precedente pa quien venga detrás», con referencia a nun compatibilizar un cargu orgánicu o técnicu nun partíu políticu cola presidencia de la entidá xuvenil.
L’alderique sobre’l relevu va dar empiezu a partir de les 11.00 hores. Amás, l’Orde del Día del Comité Executivu recueye tamién propuestes sobre la ellaboración del Plan Integral de Mocedá aprobada pol Plenu Municipal el pasáu ochobre, la XXII Xornada Municipal sobre Drogues o l’alderique de delles propuestes de resolvimientu presentaes por distintes entidaes.
